Халқаро футбол федерацияси (ФИФА) ва Халқаро профессионал футболчилар ассоциациялари федерацияси (ФИФПро) 2026 йилги жаҳон чемпионатида об-ҳаво шароити билан боғлиқ муаммолар юзасидан мулоқот олиб бормоқда, деб хабар беради ESPN.
Касаба уюшмаси бўлажак мусобақаларда ўйинчиларни кучли иссиқдан ҳимоя қилиш бўйича аниқ келишувларга эришмоқчи.
Жаҳон чемпионати-2026 доирасида Майамида Англия ва Норвегия ўртасидаги чорак финал ўйини ҳаво ҳарорати 33 даража бўлган пайтда бошланди, ҳис қилинадиган ҳарорат эса 45 даражани ташкил этди. Иссиқлик ва намликни ўз ичига олган иқлимий омиллар мажмуини ҳисобга оладиган WBGT кўрсаткичи янада муҳимроқ аҳамият касб этди. Ўйин бошланишида у 31,1 даражани ташкил қилди, бу эса ФИФПро томонидан тавсия этилган 28 даражалик чегарадан сезиларли даражада юқори.
ФИФПро тавсияларига кўра, WBGT 28 даражадан юқори бўлганда ўйинларни кечиктириш ёки кўчириш керак. Бироқ, ҳозирги пайтда ФИФА ва ФИФПро ўртасида иссиқлик туфайли ўйинларни бекор қилиш ёки кўчириш учун ягона келишилган чегара мавжуд эмас.
ФИФА қоидаларига кўра, WBGT 32 даража ёки ундан юқорига етганда салқинланиш ва сув ичиш учун мажбурий уч дақиқалик танаффус киритилади. WBGT 27 дан 32 даражагача бўлган қийматларда бундай танаффуслар ихтиёрий равишда сўралиши мумкин. ФИФПро ва ФИФА ўтган йилги Клублар ўртасидаги жаҳон чемпионати давомида ва ундан кейин ўйин шартларини аллақачон муҳокама қилган эди, шундан сўнг ФИФА жаҳон чемпионатининг кўпроқ ўйинларини куннинг энг иссиқ соатларида кондиционерли стадионларда ўтказишга қарор қилди. Масалан, иккала ярим финал ҳам Даллас ва Атлантадаги стадионларда маҳаллий вақт билан соат 15:00 да бошланади.
Ташкилотлар келажак учун аниқ регламентларни ишлаб чиқиш мақсадида муҳокамаларни давом эттирмоқда.
