51 ёшли мухлис ЖЧ-2026 чорак финали доирасидаги Аргентина ва Швейцария ўртасидаги учрашув (3:1) вақтида инфаркт туфайли вафот этди.
Воқеа жойига етиб келган тез ёрдам ходимлари эркакни жонлантиришга уринишди, бироқ кейинроқ унинг ўлимини қайд этишди.
Ambito нашрининг Буэнос-Айрес тез тиббий ёрдам хизматига (SAME) таяниб хабар беришича, пойтахтда ўйин ва ундан кейинги байрам тантаналари давомида яна олти киши юрак хуружи ва юрак билан боғлиқ бошқа ҳолатларни бошдан кечирган.
Қайд этилган ҳолатлар орасида кўкрак қафасидаги оғриқ, нафас олишнинг қийинлашиши, ҳушдан кетиш ва ўткир коронар синдромга хос белгилар бўлган. 45 ёшли эркак кўкрак қафасидаги оғриқ, нутқ бузилиши ва бир қўлнинг увишишидан шикоят қилганидан кейин касалхонага ётқизилган. Ярим соат ўтиб, 41 ёшли эркак ҳушидан кетган. Унга воқеа жойида ёрдам кўрсатилган, госпитализация талаб қилинмаган. Шунингдек, ҳушсиз ҳолатда топилган 86 ёшли юрак хасталиги бор аёлга ҳам ёрдам кўрсатилган.
Шифокорларнинг иши тун бўйи давом этган. Юрак соҳасидаги оғриқ ва нафас қисишидан шикоят қилган 74 ёшли аёл касалхонага етказилган. Кўкрак қафасидаги оғриқ билан 48 ёшли эркак ҳам госпитализация қилинган. Рўйхатга олинган охирги ҳолат нафас олиш бузилиши билан боғлиқ бўлиб, 38 ёшли аёл ҳам касалхонага ётқизилган.
