51 yoshli muxlis JCH-2026 chorak finali doirasidagi Argentina va Shveysariya o‘rtasidagi uchrashuv (3:1) vaqtida infarkt tufayli vafot etdi.
Voqea joyiga yetib kelgan tez yordam xodimlari erkakni jonlantirishga urinishdi, biroq keyinroq uning o‘limini qayd etishdi.
Ambito nashrining Buenos-Ayres tez tibbiy yordam xizmatiga (SAME) tayanib xabar berishicha, poytaxtda o‘yin va undan keyingi bayram tantanalari davomida yana olti kishi yurak xuruji va yurak bilan bog‘liq boshqa holatlarni boshdan kechirgan.
Qayd etilgan holatlar orasida ko‘krak qafasidagi og‘riq, nafas olishning qiyinlashishi, hushdan ketish va o‘tkir koronar sindromga xos belgilar bo‘lgan. 45 yoshli erkak ko‘krak qafasidagi og‘riq, nutq buzilishi va bir qo‘lning uvishishidan shikoyat qilganidan keyin kasalxonaga yotqizilgan. Yarim soat o‘tib, 41 yoshli erkak hushidan ketgan. Unga voqea joyida yordam ko‘rsatilgan, gospitalizasiya talab qilinmagan. Shuningdek, hushsiz holatda topilgan 86 yoshli yurak xastaligi bor ayolga ham yordam ko‘rsatilgan.
Shifokorlarning ishi tun bo‘yi davom etgan. Yurak sohasidagi og‘riq va nafas qisishidan shikoyat qilgan 74 yoshli ayol kasalxonaga yetkazilgan. Ko‘krak qafasidagi og‘riq bilan 48 yoshli erkak ham gospitalizasiya qilingan. Ro‘yxatga olingan oxirgi holat nafas olish buzilishi bilan bog‘liq bo‘lib, 38 yoshli ayol ham kasalxonaga yotqizilgan.
