1998 йилги жаҳон чемпиони, Франция терма жамоасининг собиқ ҳимоячиси Франк Лебёф замонавий футбол юлдузларининг пенальти тепиш услубини танқид қилди.
Собиқ «Челси» футболчиси фикрича, Лионель Месси ва Килиан Мбаппе каби юқори техникага эга ўйинчилар пенальтида ўзларига ўзлари мураккаблик яратиб қўйишмоқда, ҳолбуки улар 11 метрлик жарима зарбасини осонлик билан аниқ бажариш имкониятига эга.
«Лионель Месси, Килиан Мбаппе ва яна кўплаб иқтидорли, техник жиҳатдан кучли футболчилар нима учун баъзи вазиятларда оддийроқ ва амалийроқ ҳаракат қилмаслигини тушунмайман. 11 метр масофадан узатма ёки зарба бериш профессионал футболчи учун жуда осон. Аммо улар ҳаммасини ўзлари мураккаблаштиришади.
Улар дарвозабон билан "ўйнашни" бошлайди. Дарвозабоннинг ҳаракатини кутади, югуриб келаётганда сўнгги лаҳзада қарорини ўзгартиради. Ҳа, Неймар буни жуда маҳорат билан бажаради, аммо бу жуда катта таваккалчилик. Олдиндан бурчакни танлаб, қарорда қатъий туриб, кучли зарба бериш анча тўғри. Бундай зарбани қайтариш деярли имконсиз.
Футболчилар ўзларига жуда катта босим юклашмоқда. Мен исталган клубга бепул бориб, пенальти тепиш бўйича ёрдам беришга тайёрман, чунки ҳозирги амалга ошириш даражаси нормал ҳолат эмас», — деди Лебёф RMC Sport эфирида.
Эслатиб ўтамиз, ЖЧ–2026да Лионель Месси Австрия ва Мисрга қарши ўйинларда икки пенальтини аниқ амалга ошира олмади ва шу тариқа битта жаҳон чемпионатида икки 11 метрлик жарима зарбасини голга айлантира олмаган тарихдаги илк футболчига айланди.
Килиан Мбаппе ҳам чорак финалда Марокашга қарши баҳсда пенальтидан фойдалана олмаган, аммо кейинчалик ўйин давомида гол уришга муваффақ бўлган.
