1998 yilgi jahon chempioni, Fransiya terma jamoasining sobiq himoyachisi Frank Lebyof zamonaviy futbol yulduzlarining penalti tepish uslubini tanqid qildi.
Sobiq «Chelsi» futbolchisi fikricha, Lionel Messi va Kilian Mbappe kabi yuqori texnikaga ega o‘yinchilar penaltida o‘zlariga o‘zlari murakkablik yaratib qo‘yishmoqda, holbuki ular 11 metrlik jarima zarbasini osonlik bilan aniq bajarish imkoniyatiga ega.
«Lionel Messi, Kilian Mbappe va yana ko‘plab iqtidorli, texnik jihatdan kuchli futbolchilar nima uchun ba’zi vaziyatlarda oddiyroq va amaliyroq harakat qilmasligini tushunmayman. 11 metr masofadan uzatma yoki zarba berish professional futbolchi uchun juda oson. Ammo ular hammasini o‘zlari murakkablashtirishadi.
Ular darvozabon bilan "o‘ynashni" boshlaydi. Darvozabonning harakatini kutadi, yugurib kelayotganda so‘nggi lahzada qarorini o‘zgartiradi. Ha, Neymar buni juda mahorat bilan bajaradi, ammo bu juda katta tavakkalchilik. Oldindan burchakni tanlab, qarorda qat’iy turib, kuchli zarba berish ancha to‘g‘ri. Bunday zarbani qaytarish deyarli imkonsiz.
Futbolchilar o‘zlariga juda katta bosim yuklashmoqda. Men istalgan klubga bepul borib, penalti tepish bo‘yicha yordam berishga tayyorman, chunki hozirgi amalga oshirish darajasi normal holat emas», — dedi Lebyof RMC Sport efirida.
Eslatib o‘tamiz, JCH–2026da Lionel Messi Avstriya va Misrga qarshi o‘yinlarda ikki penaltini aniq amalga oshira olmadi va shu tariqa bitta jahon chempionatida ikki 11 metrlik jarima zarbasini golga aylantira olmagan tarixdagi ilk futbolchiga aylandi.
Kilian Mbappe ham chorak finalda Marokashga qarshi bahsda penaltidan foydalana olmagan, ammo keyinchalik o‘yin davomida gol urishga muvaffaq bo‘lgan.
