Ўзбекистон миллий терма жамоаси аъзоси, ҳужумкор ярим ҳимоячи Жасурбек Жалолиддинов фаолиятини Наманганнинг «Навбаҳор» клубида давом эттиради.

Клуб матбуот хизматининг хабар беришича, наманганликлар 24 ёшли футболчи билан расмий шартнома имзолаган.

Маълумот учун, Жасурбек Жалолиддинов фаолияти давомида ҳам маҳаллий, ҳам хорижий чемпионатларда бой тажриба тўплашга улгурган. У шу пайтгача қуйидаги жамоалар шарафини ҳимоя қилган:

• Ўзбекистонда: «Бунёдкор» ва «Локомотив» (Тошкент), «Андижон», «Олимпик» (Тошкент), «Нефтчи» (Фарғона) ҳамда «Сўғдиёна» (Жиззах);

• Хорижда: «Локомотив» (Москва, Россия), «Тамбов» (Россия), «Қайрат» (Қозоғистон) ва «Сумгаит» (Озарбайжон).

Шунингдек, Жалолиддинов Ўзбекистоннинг турли ёш тоифасидаги терма жамоаларида ҳам фаол ҳаракат қилган. У U-17 (2016-2018), U-20 (2018-2021) ва U-23 (2019 йилдан) терма жамоалари сафида майдонга тушган.

Ҳозирда маҳоратли ярим ҳимоячи Ўзбекистон миллий терма жамоаси аъзоси ҳисобланади.