«Барселона», «Манчестер Сити» ва «Бавария» клубларида ишлаган таниқли испаниялик мураббий Хосеп Гвардиола ҳозирча ўз ишини соғинмаётганини тан олди. Эслатиб ўтамиз, мутахассис ўтган мавсум якунида «шаҳарликлар» бош мураббийлигидан кетган эди.

«Ички дунёмда ҳеч нарсани соғинмаяпман. Мураббийлик фаолиятини 37 ёшимда бошлаганман ва ҳаётимнинг барчаси футбол билан боғлиқ эди. Энди эса футболга алоқаси бўлмаган бошқа машғулотлар билан шуғулланиб, янги ҳаётни кашф этмоқчиман ва бахтли бўлишни истайман. Ҳали танаффусдан кейинги ҳаётга мослашиш жараёнидаман, аммо ҳаммаси анча яхши кечмоқда», — деди мураббий Okx билан суҳбатда.

Гвардиоланинг қўшимча қилишича, у вақтини оиласига ва ўзига бағишлашни истайди. Айнан шу ҳолат унинг «Манчестер Сити»дан кетишига асосий сабаблардан бири бўлган.

55 ёшли мураббий Чемпионлар лигасининг уч карра ғолиби ҳисобланади. Испаниялик мутахассис «Манчестер Сити» билан олти марта Англия Премьер-лигасида, «Барселона» билан уч марта Ла Лигада, «Бавария» билан эса уч марта Бундеслигада чемпионликка эришган.