Кўпчиликда бир савол туғилган эди: оддий ишчи оиласида туғилган, футбол оламида ҳеч қандай алоқаси бўлмаган беш ойлик Ламин Ямал қандай қилиб Лионель Месси иштирок этган фотосессияга тушиб қолган?

Жавоб жуда оддий — бу мутлақо тасодиф эди.

2007 йил охирида Испаниянинг Sport нашри ва UNICEF ҳамкорликда «Барселона» футболчилари ҳамда чақалоқлар иштирокида хайрия тақвимини тайёрлашга киришади. Ямалнинг ота-онаси уни танлов учун рўйхатдан ўтказади ва Ламин тасодифий танлаб олинган болалар қаторига киради.

Ўша пайтда 20 ёш бўлган Лионель Месси ҳам мазкур фотосессияда иштирок этади.

Суратга олиш ишлари «Камп Ноу» стадионида бўлиб ўтади. Фотосуратчи Жоан Монфорт Мессининг кичик Ламинни меҳр билан қўлида ушлаб, уни чўмилтираётган лаҳзаларини кадрга муҳрлайди.

Ўша куни ҳеч ким бу чақалоқ йиллар ўтиб «Барселона» сафига қўшилиши, афсонавий 10-рақамли футболкани кийиши ва жаҳон футболининг энг ёрқин юлдузларидан бирига айланишини тасаввур ҳам қилмаган.

Бу фотосуратлар узоқ йиллар давомида деярли эътибордан четда қолди. Фақат Ламин Ямалнинг юлдузли фаолияти бошланганидан кейин улар яна кенг жамоатчилик эътиборига тушди.

Орадан қарийб йигирма йил ўтиб, ўша номсиз чақалоқ ва уни қўлида кўтариб турган ёш футболчи энди ЖЧ–2026 финалида Испания ва Аргентина терма жамоалари сардорларидан бири сифатида бир-бирига қарши майдонга тушиши мумкин.

Ҳеч қандай таниш-билиш ҳам, махсус алоқалар ҳам бўлмаган. Фақат оддий танлов, хайрия фотосессияси ва кейинчалик тақдирдек туюладиган ажойиб тасодиф.