Жаҳон чемпионатида мухлисларга танилган Кабо-Верде терма жамоаси дарвозабони Возинья фаолиятини Чилида давом эттириши мумкин. Маҳаллий «Коло-Коло» клуби президент Анибаль Мосанинг топшириғига кўра 40 ёшли посбон билан музокараларни бошлади. Бу ҳақда журналист Сесар Луис Мерло X ижтимоий тармоғида хабар берди.
Манба берган маълумотларга кўра, «Коло-Коло» бош мураббийи Фернандо Ортис Возиньяни жамоасига олиб келишни шахсан сўрамаган, аммо музокаралар давом эттирилишига ва ўйинчининг таркибда пайдо бўлиши эҳтимолига қарши эмас.
Возинья ЖЧ-2026 да тўртта ўйинда майдонга тушиб, улардан иккитасида ўз дарвозаси дахлсизлигини сақлаб қолди. Унинг Португалия иккинчи дивизионида иштирок этувчи «Шавиш» клуби билан шартномаси шу ёзда ўз ниҳоясига етди. Кабо-Верде терма жамоаси ўз тарихида илк бор Жаҳон чемпионатининг финал босқичида иштирок этди ва 1/16 финалда Аргентинага (2:3) имкониятни бой бериб, мусобақадаги иштирокини якунлади.
