«Реал Мадрид» «РБ Лейпциг» вингери Ян Диоманде трансфери бўйича муҳим қадамни ташлади. Трансферлар бўйича эксперт Фабрицио Романонинг хабар беришича, Испания гиганти футболчи билан шахсий шартнома шартлари бўйича тўлиқ оғзаки келишувга эришди.
Кот-д’Ивуар терма жамоасининг 19 ёшли аъзоси «Реал Мадрид»нинг таклифини қабул қилган ва 2031 йилгача мўлжалланган 5 йиллик шартнома имзолашга тайёр. Диоманде аввалроқ «ПСЖ» билан ҳам шахсий шартномани келишиб олган эди, бироқ эндиликда у «қироллик клуби» таклифига розилик берди.
«Реал Мадрид»нинг 90 миллион евро ва қўшимча 10 миллион евро бонус кўринишидаги илк таклифи рад этилгач, клуб «РБ Лейпциг»га яхшиланган таклиф билан қайтиши кутилмоқда. Хабарларга кўра, Бундеслига клуби ёш иқтидорни бонуслар билан бирга тахминан 115–120 миллион еврога баҳоламоқда.
«Реал» устунликни ўз қўлига олган бўлса-да, «ПСЖ» ҳам курашдан чекингани йўқ. Франция чемпионлари футболчининг вакиллари билан қайта алоқага чиққан ва трансфер ойнаси ёпилгунга қадар уни ўз сафига қўшиб олиш учун курашни давом эттирмоқчи.
