Халқаро футбол ассоциациялари федерацияси (ФИФА) президенти Жанни Инфантино ташкилотдаги аксарият амалдорлар қўлловидан маҳрум бўлган ва лавозимидан четлатилиши мумкин. Бу ҳақда журналист Ромэн Молина X ижтимоий тармоғида хабар берди.

Манба маълумотига кўра, ФИФА раҳбариятида Инфантинога нисбатан норозилик кучайган. Бунга унинг АҚШ президенти Дональд Трампни сўзсиз сиёсий жиҳатдан қўллаб-қувватлаши ҳамда барча қарорларни ҳеч кимга ҳисоб бермасдан мустақил қабул қиладиган бошқарув услуби сабаб бўлган.

Аввалроқ ФИФА қиймати 20 миллиард доллар бўлган шўъба компания ташкил этиш лойиҳаси концепциясини эълон қилган эди. Режага кўра, мазкур компаниянинг 25 фоизи хусусий инвесторларга 4,2 миллиард долларга сотилади.

Шунингдек, миллий футбол федерацияларига ажратиладиган молиявий тўловларни ошириш режалаштирилган. Яқин тўрт йиллик циклда ушбу маблағ 8 миллион доллардан 20 миллион долларга етказилади. Кейинги икки циклда эса мос равишда 22 миллион ва 24 миллион доллар тўланиши кўзда тутилган.

Таъкидланишича, мазкур лойиҳани амалга ошириш учун ФИФАга аъзо федерацияларнинг кўпчилиги розилиги ҳамда ФИФА Кенгашининг тасдиғи талаб этилади.