Xalqaro futbol assosiasiyalari federasiyasi (FIFA) prezidenti Janni Infantino tashkilotdagi aksariyat amaldorlar qo‘llovidan mahrum bo‘lgan va lavozimidan chetlatilishi mumkin. Bu haqda jurnalist Romen Molina X ijtimoiy tarmog‘ida xabar berdi.

Manba ma’lumotiga ko‘ra, FIFA rahbariyatida Infantinoga nisbatan norozilik kuchaygan. Bunga uning AQSH prezidenti Donald Trampni so‘zsiz siyosiy jihatdan qo‘llab-quvvatlashi hamda barcha qarorlarni hech kimga hisob bermasdan mustaqil qabul qiladigan boshqaruv uslubi sabab bo‘lgan.

Avvalroq FIFA qiymati 20 milliard dollar bo‘lgan sho‘’ba kompaniya tashkil etish loyihasi konsepsiyasini e’lon qilgan edi. Rejaga ko‘ra, mazkur kompaniyaning 25 foizi xususiy investorlarga 4,2 milliard dollarga sotiladi.

Shuningdek, milliy futbol federasiyalariga ajratiladigan moliyaviy to‘lovlarni oshirish rejalashtirilgan. Yaqin to‘rt yillik siklda ushbu mablag‘ 8 million dollardan 20 million dollarga yetkaziladi. Keyingi ikki siklda esa mos ravishda 22 million va 24 million dollar to‘lanishi ko‘zda tutilgan.

Ta’kidlanishicha, mazkur loyihani amalga oshirish uchun FIFAga a’zo federasiyalarning ko‘pchiligi roziligi hamda FIFA Kengashining tasdig‘i talab etiladi.