Денис Истомин "St.Peterburg Open" мусобақасининг чорак финалига йўл олди. Ҳамюртимиз турнирнинг иккинчи даврасида қозоғистонлик Андрей Голубевни 3та сетда мағлуб этди.

Учрашувнинг дастлабки сетида АТР рейтингида 139-поғонасида бораётган теннисчи ғалаба қозонди — 6:4. Иккинчи сетда эса Истомин 6:3 ҳисобида ғалаба қозониб, ҳисобни тенглаштирди.

Ҳал қилувчи сетда Денис рақибидан битта брейк олишга муваффақ бўлди. Ҳисоб 5:3 бўлиб турганида, рақибнинг тўп узатишида ҳамюртимиз матч-поинтга эга бўлди, аммо у мазкур имкониятдан фойдалана олмади. Ўйин тақдири эса Истомин тўпни ўйинга киритган 10-геймда ҳал бўлди — 6:4. Ўйин 2 соату 11 дақиқа давом этди. Истомин ва Голубев ўртасидаги ўзаро баҳсда вакилимиз 2:1 ҳисобида олдинга чиқиб олди.

Ўзбекистоннинг биринчи ракеткаси чорак финалда испаниялик Гильермо-Гарсия Лопес билан кортга чиқади. АТР рейтингида 74-ўринда бораётган спортчи нимчорак финалда россиялик Михаил Южнийни (20-ўрин) мусобақадан чиқариб юборди.