"Комо" "Челси" ҳужумчиси Лиам Делапни ўз сафига қўшиб олиш имкониятини ўрганмоқда.
Инсайдер Фабрицио Романо маълумотига кўра, Италия клуби 23 ёшли англиялик форвард трансфери юзасидан дастлабки сўров билан чиққан. Делап "Комо"нинг ҳужум чизиғини кучайтириш учун тузилган қисқа рўйхатида юқори ўринлардан бирини эгалламоқда. Футболчи шу ёзда "Челси"ни тарк этиши мумкин.
Ҳозирча гап расмий трансфер таклифи ҳақида эмас. "Комо" биринчи навбатда битимни амалга ошириш шартлари ва "Челси"нинг талабларини аниқлашга ҳаракат қилмоқда. Томонлар ўртасидаги муносабатлар яхши экани музокараларни осонлаштириши мумкин.
"Челси" ҳам Делапни сотиш вариантига очиқ. Сўнгги хабарларга кўра, Лондон клуби футболчи учун 50 млн фунтдан ортиқ маблағ талаб қилмоқда. "Челси" уни 2025 йил ёзида "Ипсвич"дан 30 млн фунтлик товон пулини фаоллаштириш орқали харид қилган ва 2031 йилгача шартнома имзолаган эди.
Делапнинг "Челси"даги биринчи мавсуми кутилганидек ўтмади. У барча мусобақаларда атиги 2 та гол урди ва жамоа ҳужумида доимий асосий футболчига айлана олмади. Янги бош мураббий Хаби Алонсо қўл остида ҳам марказий ҳужумчи позициясида рақобат юқори — Жоау Педро асосий вариант сифатида қаралмоқда.
Шунга қарамай, Делапнинг Премьер-лигада ўзини кўрсатган тажрибаси бор. У 2024/25 йилги мавсумда "Ипсвич" сафида 12 та гол уриб, жамоанинг чемпионатдаги энг яхши тўпурари бўлган эди.
"Комо"нинг қизиқиши жиддий тус олса, Делап фаолиятида илк бор Англиядан ташқарида тўп суриши мумкин. Ҳозирча италияликлар дастлабки алоқани ўрнатган, кейинги қадам эса "Челси" билан трансфер нархи ва битим формати бўйича музокараларга боғлиқ.
