«Ювентус» «Астон Вилла»га дарвозабон Эмилиано Мартинеснинг трансфери бўйича янги таклиф билан чиқди, деб хабар бермоқда The Athletic.

Турин клуби 7 миллион евро ва жамоанинг натижаларига боғлиқ бўлган яна 3 миллион евро бонус тўлашга тайёр. Англияликлар эса аргентиналик посбон учун кафолатланган 10 миллион евро олмоқчи, бироқ томонларнинг позициялари секин-аста яқинлашмоқда.

33 ёшли аргентиналик футболчи билан шахсий шартнома шартларини келишиш муаммо туғдирмайди. Унинг «Астон Вилла» билан амалдаги шартномаси 2029 йилнинг ёзигача мўлжалланган. Мартинес бўйича музокаралар фонида Бирмингем клуби «Парма» дарвозабони Зион Судзукини тахминан 30 миллион еврога сотиб олишни кўриб чиқмоқда.

Ўтган мавсумда Мартинес барча турнирларда 44 та ўйинда майдонга тушиб, «Астон Вилла»га АПЛда тўртинчи ўринни эгаллашга ва Европа Лигасида ғолиб чиқишга ёрдам берди. Жаҳон чемпионатида у Аргентина терма жамоасининг барча 8 та учрашувида ўйнади (жамоа финалда Испанияга 0:1 ҳисобида имкониятни бой берди).

Аргентиналик посбон 2020 йилдан бери «Астон Вилла» шарафини ҳимоя қилиб келмоқда ва клуб сафида 256 та ўйин ўтказган.