Ферран Торреснинг «ПСЖ»га ўтиши «Барселона»нинг трансфер бозоридаги имкониятларини сезиларли даражада оширди, деб хабар беради Diario Sport.
Каталония клуби ҳужумчини деярли 50 миллион еврога сотди. Ушбу битим «Барселона» тарихидаги бешинчи энг йирик сотувга айланди.
2022 йилнинг январь ойида Ферран 55 миллион евро эвазига сотиб олинган ва у билан 2027 йилнинг ёзигача шартнома имзоланган эди. Унинг йиллик амортизацияси 10 миллион еврони ташкил этгани сабабли, сотув вақтида клуб ҳисоботида айнан шунча сумма қолган эди.
Шу тариқа, «Барселона» ушбу трансфердан тахминан 40 миллион евро соф фойда олди. Шунга қўшимча равишда, клуб шартноманинг охирги йили учун футболчининг маошидан тахминан 10 миллион евро иқтисод қилди. Умумий ҳисобда Торреснинг кетиши молиявий фэйр-плей (FFP) доирасида 50 миллион еврони бўшатди.
Манбанинг ҳисоб-китобларига кўра, Родрини 70 миллион евролик трансфер ва тўрт йиллик шартнома билан рўйхатдан ўтказиш учун «Барселона»га тахминан 37,5 миллион евро керак бўлади. Карим Адейемини рўйхатдан ўтказиш эса яна 16,4 миллион еврога тушади. Демак, Ферраннинг сотуви икки футболчи учун талаб этиладиган умумий 53,9 миллион евролик молиявий юкламани деярли тўлиқ қоплайди.
