«Тоттенхэм» ярим ҳимоячиси Лукас Бергвалл ёзги трансфер ойнаси ёпилгунига қадар клубини алмаштириши мумкин.

Журналист Гэри Уорд маълумотига кўра, 20 ёшли швециялик футболчи ҳамон «Ньюкасл» ва «Ноттингем Форест» клубларининг трансфер рўйхатида турибди. Кутилишича, ҳар икки жамоа ҳам трансфер ойнасининг сўнгги кунларида Бергваллни сотиб олишга уриниб кўради.

Манбага кўра, «Тоттенхэм» футболчи учун 70 млн евро миқдорида таклиф тушса, уни қўйиб юборишга тайёр.

Бергвалл ўтган мавсумда барча мусобақалар доирасида 33 та учрашувда майдонга тушиб, 1 та гол урди ва 5 та голли узатмани амалга оширди.

Швециялик ярим ҳимоячининг «Тоттенхэм» билан амалдаги шартномаси 2031 йилга қадар мўлжалланган.