"Барселона" тарбияланувчиси Хави Эспарт 2026/27 йилги мавсумдан бошлаб асосий жамоада 17-рақам остида ҳаракат қилиши кутилмоқда. Бу ҳақда Mundo Deportivo хабар берди.
Ушбу рақамнинг аввалги эгаси Марк Касадо эди. Манбага кўра, Касадонинг 17-рақами Ла Лига расмий сайтидаги "Барселона" таркибидан олиб ташланган. Футболчининг клубни тарк этиши кутилмоқда, Эспарт эса унинг асосий жамоадаги ўрнини эгаллашга яқин турибди.
19 ёшли Эспарт мавсумолди йиғинларида бош мураббий Ҳанси Фликда яхши таассурот қолдирди. Хусусан, "Базель"га қарши ўртоқлик учрашувида у асосий таркибда майдонга тушиб, 79 дақиқа ҳаракат қилди. Ёш футболчи учрашув давомида ҳам таянч яримҳимоячиси, ҳам марказий яримҳимоячи сифатида ўйнади. Бундан аввалги ўйинларда эса ўнг қанот ҳимоясида ҳам синаб кўрилган.
Эспарт "Барселона" академиясига 2015 йилда қўшилган ва Ла Масиянинг турли ёш тоифаларида босқичма-босқич ўсиб борган. У яримҳимояда ҳам, ҳимоя қанотида ҳам ўйнай олиши билан ажралиб туради.
Футболчи "Барселона" асосий жамоасидаги расмий дебютини 2026 йил 10 март куни Чемпионлар лигасида "Ньюкасл"га қарши ўйинда ўтказган. У ўша баҳснинг сўнгги дақиқаларида Рональд Араухонинг ўрнига майдонга тушган ва Ҳанси Флик даврида асосий жамоада дебют қилган Ла Масиянинг 12-тарбияланувчисига айланган.
Эспартнинг "Барселона" билан амалдаги шартномаси 2028 йил 30 июнгача мўлжалланган. Клуб унинг келишувини 2025 йил августида узайтирган эди.
Шу тариқа, мавсумолди тайёргарлигида Фликнинг ишончини қозонган Эспарт янги мавсумда асосий жамоада кўпроқ имконият олиши ва Касадодан бўшайдиган 17-рақамни қабул қилиши кутилмоқда.
