"Ливерпуль" ярим ҳимоячиси Кёртис Жонс фаолиятини "Интер"да давом эттиради.
Милан клуби футболчининг трансфери бўйича мерсисайдликлар билан келишувга эришган. Машҳур инсайдер Фабрицио Романонинг хабар беришича, битим қиймати 35 миллион еврони ташкил этади.
"Интер" 25 ёшли англиялик футболчи билан шахсий шартнома шартларини ҳам келишиб олган. Яқин вақт ичида Жонс тиббий кўрикдан ўтади ва шундан сўнг трансфер расман якунланиши мумкин.
Кёртис Жонс "Ливерпуль" тарбияланувчиси ҳисобланади ва бутун профессионал фаолиятини шу клуб сафида ўтказган. У мерсисайдликлар таркибида 228 та ўйинда майдонга тушиб, 22 та гол урган ва 25 та голли узатмани амалга оширган.
