"Челси" марказий ҳимоячиси Мамаду Саррга трансфер бозорида бир қатор клублар қизиқиш билдирмоқда.
Журналист Низаар Кинселла маълумотига кўра, "Реал Сосьедад" 20 ёшли футболчини ижарага олмоқчи, Саудия Арабистонининг "Ал-Ҳилол" клуби эса уни сотиб олиш имкониятини кўриб чиқмоқда.
Бундан ташқари, Саррга Англия Премьер-лигаси вакиллари, шунингдек, Чемпионлар лигаси ва Европа лигасида иштирок этадиган номи ошкор этилмаган клублар ҳам қизиқиш билдирмоқда.
Transfermarkt портали Мамаду Саррнинг бозор қийматини 22 миллион еврога баҳоламоқда. Ўтган ёзда "Челси" сенегаллик ҳимоячини "Страсбург"дан харид қилган ва кейин уни февраль ойига қадар шу клубга ижарага берган. Сарр "Челси"нинг асосий жамоаси сафида 7 та учрашув ўтказган.
