Мадриднинг «Реал» клуби «Гранада» ҳужумчиси Райан Зинебини ўз сафига қўшиб олишга яқин турибди. Бу ҳақда ESPN журналисти Родра хабар берди.
«Қироллик клуби» 19 ёшли марокашлик футболчини асосий жамоа учун эмас, балки «Реал»нинг захира жамоаси — «Кастилья» таркибини кучайтириш мақсадида олиб келмоқда.
Сўнгги маълумотларга кўра, Зинеби дастлаб ижара асосида «Кастилья»га қўшилиши, келишувда эса уни тахминан 2 миллион еврога тўлиқ сотиб олиш ҳуқуқи бўлиши кутилмоқда.
Айни пайтда Марокаш U20 терма жамоаси ихтиёрида бўлган Зинеби жорий йил март ойида «Гранада»нинг асосий жамоасида дебют қилди. У ўтган мавсумда «Гранада»нинг захира жамоаси сафида 7 та гол уришга муваффақ бўлди.
Зинеби Барселонада туғилган. У футболдаги дастлабки қадамларини «Корнелья» академиясида қўйган, кейинчалик «Прат»да тўп тепган. 2025 йил сентябрда эса «Гранада» сафига келиб қўшилган.
