Madridning «Real» klubi «Granada» hujumchisi Rayan Zinebini o‘z safiga qo‘shib olishga yaqin turibdi. Bu haqda ESPN jurnalisti Rodra xabar berdi.

«Qirollik klubi» 19 yoshli marokashlik futbolchini asosiy jamoa uchun emas, balki «Real»ning zaxira jamoasi — «Kastilya» tarkibini kuchaytirish maqsadida olib kelmoqda.

So‘nggi ma’lumotlarga ko‘ra, Zinebi dastlab ijara asosida «Kastilya»ga qo‘shilishi, kelishuvda esa uni taxminan 2 million yevroga to‘liq sotib olish huquqi bo‘lishi kutilmoqda.

Ayni paytda Marokash U20 terma jamoasi ixtiyorida bo‘lgan Zinebi joriy yil mart oyida «Granada»ning asosiy jamoasida debyut qildi. U o‘tgan mavsumda «Granada»ning zaxira jamoasi safida 7 ta gol urishga muvaffaq bo‘ldi.

Zinebi Barselonada tug‘ilgan. U futboldagi dastlabki qadamlarini «Kornelya» akademiyasida qo‘ygan, keyinchalik «Prat»da to‘p tepgan. 2025 yil sentyabrda esa «Granada» safiga kelib qo‘shilgan.