«Барселона» «Интер» ҳужумчиси Лаутаро Мартинесни ўз сафига қўшиб олишни истамоқда. Бу ҳақда El Chiringuito TV хабар берди.

Манба маълумотига кўра, каталонияликлар 28 ёшли аргентиналик футболчи учун илк расмий таклифни тайёрламоқда. Унинг миқдори 100 миллион евродан ошмаслиги кутилмоқда.

Лаутаронинг «Интер» билан амалдаги шартномаси 2029 йилга қадар мўлжалланган. Transfermarkt портали ҳужумчининг бозор қийматини 85 миллион еврога баҳоламоқда.

Мартинес 2018 йилдан буён «Интер» шарафини ҳимоя қилиб келмоқда. Ўтган мавсумда у барча мусобақалар доирасида 41 та учрашувда майдонга тушиб, 22 та гол урди ва 6 та голли узатмани амалга оширди.