"Рома" "Фенербахче" ҳимоячиси Жейден Остерволдени қўлга киритиш бўйича музокараларни фаоллаштирди.

Sky Sport Italia маълумотига кўра, римликлар 25 ёшли нидерландиялик футболчини кейинчалик сотиб олиш ҳуқуқи билан ижарага олиш бўйича таклиф юборган. Муайян шартлар бажарилса, сотиб олиш мажбурий тус олиши ҳам мумкин. Томонлар музокараларни давом эттирмоқда.

Сўнгги хабарларда битимнинг умумий қиймати 20 млн еврога яқинлашиши мумкинлиги айтилмоқда. Аввалроқ "Рома" 15 млн евро атрофидаги таклиф билан чиққан, аммо "Фенербахче" уни қабул қилмаганди.

Остерволде "Фенербахче"да 2023 йил январидан буён тўп суриб келади. Унинг универсаллиги "Рома" учун муҳим омил — футболчи марказий ва чап қанот ҳимоячиси позицияларида ҳаракат қила олади.

Нидерландиялик ҳимоячи аввал Италия футболида ҳам ўйнаган — у "Парма" шарафини ҳимоя қилган.