ФИФА президенти Жанни Инфантинодан ташкилот атрофидаги можаролар фонида Доминикан Республикасида ўтаётган ўсмирлар турнирига ташриф буюрмаслик сўралди. Бу ҳақда Reuters хабар берди.

Инфантино Доминикан Республикасига етиб борган ва у ерда маҳаллий расмийлар томонидан кутиб олинган. Бироқ КОНКАКАФ президенти Виктор Монтальяни ФИФА раҳбарига мурожаат қилиб, унинг 14 ёшгача бўлган футболчилар ўртасидаги мусобақада иштирок этиши мақсадга мувофиқ эмаслигини билдирган.

«Футбол манфаатларини инобатга олган ҳолда, ташрифингизни қайта кўриб чиқишингизни ҳурмат билан сўрайман. Афсуски, сизнинг иштирокингиз ёш футболчиларни ривожлантиришга қаратилган ушбу муҳим тадбирнинг спорт руҳига салбий таъсир кўрсатиши мумкин», — дейилади Монтальянининг Инфантинога йўллаган мактубида.

Маълум қилинишича, Инфантино ушбу мусобақага ФИФАнинг Жаҳон чемпионати билан боғлиқ тижорий ҳуқуқларнинг бир қисмини хусусий инвесторларга бериш режаси ошкор бўлишидан аввал таклиф қилинган. Мазкур ташаббус футбол ташкилотлари орасида жиддий норозиликларга сабаб бўлди ва кейинчалик Инфантино режадан воз кечди.

Айни пайтда ФИФА раҳбарига нисбатан босим кучайиб бормоқда. УЕФА, КОНКАКАФ ва ОФК раҳбарияти томонидан Инфантинонинг режаси ҳамда ташкилот бошқарувига оид масалалар кескин танқид қилинмоқда.