Камерун футбол федерацияси президенти, машҳур собиқ футболчи Самюэль Это’О ФИФА раҳбари Жанни Инфантинони унинг манзилига билдирилаётган танқидлар ва ташкилот президенти сайловлари арафасида қўллаб-қувватлади.
Это’Онинг фикрича, Инфантино кичик мамлакатлар ва Африкада футбол ривожига катта ҳисса қўшган.
«Мен президент Жанни Инфантино нотўғри иш қилди, деб ўйламайман. Менимча, буларнинг барчаси у иштирок этадиган сайловлар яқинлашаётгани билан боғлиқ. У аввал бундай имкониятга эга бўлмаган мамлакатларга энг ажойиб мусобақа — футбол бўйича жаҳон чемпионатида иштирок этиш имконини берди.
У кичик мамлакатларнинг бу мусобақаларда иштирок этишига ёрдам берди, қитъамиз ва федерацияларимизнинг анча тез ривожланишига кўмаклашди. Биз уни қилган ишлари учун қўллаб-қувватлашимиз керак», — дея Это’Онинг сўзларини келтиради CNN.
Июль ойида Инфантино FIFA Forward Enterprise компаниясини ташкил этишни режалаштираётгани маълум бўлганди. Ушбу тузилма ФИФАнинг эркаклар ва аёллар ўртасидаги асосий мусобақаларини назорат қилиши кўзда тутилган. ФИФА маълумотига кўра, лойиҳа 4,2 миллиард доллар жалб қилиши мумкин.
Бироқ УЕФА, КОНКАКАФ, Осиё футбол конфедерацияси ва КОНМЕБОЛ ушбу ташаббусга қарши чиқди. The Telegraph маълумотига кўра, УЕФАда Инфантинога ишончсизлик вотуми билдириш имконияти ҳам кўриб чиқилмоқда.
Жанни Инфантино 2016 йил февралидан буён ФИФА президенти лавозимида ишлаб келмоқда. Ташкилот раҳбарлиги учун навбатдаги сайлов 2027 йил март ойида Марокашда ўтказилиши режалаштирилган.
