"Челси" ярим ҳимоячиси Энцо Фернандес трансфер ойнаси ёпилгунига қадар "Манчестер Сити"га ўтиши мумкин. Лондон клуби аргентиналик футболчининг эҳтимолий кетишига тайёргарлик кўриб, унинг ўрнига тўрт нафар номзоддан иборат рўйхат тузди.
talkSPORT маълумотига кўра, "Манчестер Сити" Фернандес учун таклиф юбориш имкониятини ҳамон кўриб чиқмоқда. "Челси" аввалроқ 25 ёшли футболчи учун 120 миллион фунт талаб қилган ва трансфер бўйича белгиланган муддат ўтиб кетганига қарамай, музокаралар қайта бошланиши мумкин.
Агар Фернандес сотилса, "Челси" унинг ўрнига "Борнмут"дан Алекс Скотт, "Кристал Пэлас"дан Адам Уортон, "Рома"дан Ману Коне ёки "Реал"дан Эдуарду Камавингани олиб келишни кўриб чиқади.
Манбага кўра, "Челси" айниқса Алекс Скотт ва Адам Уортонга жиддий қизиқиш билдирмоқда. Бироқ уларнинг клублари футболчиларни сотишга шошилмаяпти. "Борнмут" Скотт учун "Челси"нинг 64 миллион фунтлик таклифини рад этган.
