Ўзбекистон U-17 терма жамоаси Испаниядаги ўқув-машғулот йиғини доирасида дастлабки назорат учрашувини ўтказди. Сергей Чигодаев шогирдларига Уругвай ўсмирлар терма жамоаси рақиблик қилди.

Албир шаҳрида кечган баҳс Жанубий Америка вакилларининг устунлиги билан якунланди. Уругвай U-17 жамоаси Ўзбекистон дарвозасига учта жавобсиз гол уриб, 3:0 ҳисобида ғалаба қозонди.

Вакилларимиз учрашувни Шомуродов, Олимов, Маматов, Эркинов, Равшанов, Анваров, Орифхонов, Абдунабиев, Уктамбоев, Абдураимов ва Раҳимовдан иборат таркибда бошлади.

Баҳс давомида Сирожиддинов, Абдисолиев, Абдуллаев, Тоҳиров, Муродов, Эшпўлатов, Ўктамов, Марупов, Толибжонов ҳамда Хайруллаев захирадан ўйинга қўшилди.

Чигодаев шогирдларини Испаниядаги йиғинда яна бир жиддий синов кутмоқда. Ўзбекистон U-17 терма жамоаси 27 август куни мезбон Испания U-17 жамоасига қарши майдонга тушади.

Ўртоқлик учрашуви
Уругвай U-17 — Ўзбекистон U-17 — 3:0