Суперлиганинг 19-туридан ўрин олган ОКМКга қарши учрашувдан (0:0) кейинги матбуот анжуманида «Сурхон» бош мураббийи Анвар Ғафуров журналистлар саволларига жавоб берди.

— Бугунги учрашув ҳақида фикрларингиз?

«Бугун яхши жамоага қарши майдонга тушдик. Рақиб ҳужумкор футбол кўрсатишини ва кимга қарши ўйнаётганимизни яхши билардик. Биз учун ҳар бир ўйинда очко жуда муҳим эканини футболчиларга тушунтирган эдик.

Ўйлайманки, кўп ўйинларда натижа жиҳатидан мағлуб бўлаётган бўлсак-да, ўйин сифати ва майдондаги ҳаракатларимиз борасида рақиблардан ортда қолаётганимиз йўқ. Албатта, бу яхши кўрсаткич, аммо жамоага натижа ҳам керак. Ишонаманки, биз бу натижага албатта эришамиз.

Бугунги ўйин осон кечмади. Йигитларга катта раҳмат айтаман. Улар майдонда бор куч ва имкониятларини ишга солиб, охиригача меҳнат қилишди.

Шунингдек, Термиздан узоқ масофани босиб ўтиб, бизни ўз стадионимизда ёлғиз қолдирмаган мухлисларимизга алоҳида миннатдорчилик билдираман. Уларнинг қўллаб-қувватлаши футболчиларимизга катта далда бўлди.

Бу ўйинда қизил карточка ҳам ўз таъсирини кўрсатди. Шундан кейин футболчилар хато қилмасликка, бир-бирини қўллаб-қувватлашга ва жамоавий ҳаракат қилишга интилди. Бу, албатта, ижобий ҳолат».

— Қизил карточкадан сўнг ёш жамоангизни қандай руҳлантира олдингиз?

«Мен ҳар бир футболчимга ишонаман. Бу майдонда бўладими ёки майдон ташқарисидами — фарқи йўқ. Якуний кенгайтирилган таркибга кирмаган футболчи ҳам, майдонга тушган ҳар бир ўйинчи ҳам ўз вазифасини бажаришга ва бор кучини беришга тайёр бўлиши керак.

Бизда, албатта, ўзига яраша камчиликлар бор. Аммо энг муҳими — ҳар бир футболчи ўз вазифасини тўғри бажариши ва жамоа учун борини бериши керак. Мен футболчиларимга ишонаман».

— Бугун устозингизга қарши майдонга тушдингиз. Кейинги турда эса «Бунёдкор»га қарши ўйнайсиз. Қандай учрашув кутяпсиз?

«Олдинда кубок ўйини ҳам бор. Албатта, футболда ҳеч нарсани олдиндан айтиб бўлмайди. Агар кимдир натижани олдиндан аниқ била олганида, эҳтимол, у жаҳон чемпиони бўлар эди.

Ҳар сафар чемпионлар ва кучли жамоалар ўзгариб турар экан, демак, биз ҳам доимо ишлашимиз ва ҳар бир ўйинга жиддий тайёргарлик кўришимиз керак.

«Бунёдкор»га қарши ҳам қизиқарли ва мазмунли ўйин бўлади, деб ўйлайман. Биз ҳар бир учрашувга алоҳида тайёргарлик кўрамиз ва майдонга максимал натижа учун чиқамиз», — деди Анвар Ғафуров.