"Лион" бош мураббийи Паулу Фонсека Чемпионлар лигаси саралаш босқичи плей-оффининг жавоб учрашувида "Фенербахче"дан 1:2 ҳисобида мағлуб бўлганидан кейин ҳеч қачон таслим бўлмаслигини таъкидлади.
"Ҳозир менда турли ҳиссиётлар аралашиб кетган. Кейинги босқичга чиқишни хоҳлаганимиз учун хафамиз, мухлисларимиз ҳам бунга муносиб эди. Аммо биз таркибида бир нечта жуда кучли футболчилари бор яхши жамоага қарши ўйнадик. Шунга қарамай, биз яхши ўйнадик, деб ўйлайман.
"Лион" хавфли вазиятлар яратди. Қисқа вақт ичида икки гол ўтказиб юборганимиз ачинарли. Лекин бизда аниқ голли имкониятлар бўлди ва футболчилар сўнгги дақиқагача курашди.
Позитив кайфиятни сақлаб қолиши керак бўлган биринчи инсон мен бўлишим шарт. Салбий жиҳатлар бор, аммо ижобий томонлар ҳам жуда кўп. Биз кучли рақибга қарши ўйнадик ва, албатта, Чемпионлар лигасида иштирок этишни истардик. Аммо вазиятга кенгроқ нуқтаи назардан қарашим керак.
Эртага янги кун бошланади. Тушкунликка тушиш учун вақтимиз йўқ. Мураббийлик ҳаёти шундай. Мен ўз ишимни яхши кўраман ва ҳеч қачон таслим бўлмайман", — деди Фонсека. Унинг сўзларини UEFA расмий сайти келтирди.
