Аргентина терма жамоаси сардори Лионел Мессининг халқаро ўртоқлик учрашувларидаги иштироки сўроқ остида. Шу сабабли терма жамоа расмийлари Хитойдаги учрашувларни ўтказиш бўйича музокараларни қайта бошлади.
Сентябр охири ва октябрь бошларини қамраб олувчи навбатдаги кузги халқаро танаффус ФИФА қоидаларига кўра, терма жамоаларга тўрттагача ўртоқлик учрашуви ўтказиш имконини беради. Бироқ 2026-йилги Жаҳон чемпионати финалидан сўнг терма жамоанинг навбатдаги йиғинигача бир ойдан кам вақт қолганига қарамай, Аргентина футбол ассоциацияси ҳозирча бирорта учрашувни расман тасдиқламади.
ESPN Аргентина инсайдери Эстебан Эдулнинг хабар беришича, хитойлик промоутерлар Аргентина терма жамоасиган Осиёда бир нечта ўртоқлик учрашувларини ўтказиш бўйича йирик молиявий таклиф юборган. Бироқ ташкилотчилар шартномага Месси ушбу ўйинларда майдонга тушишини кафолатловчи бандни киритишни талаб қилган. Аргентина футбол ассоциацияси эса бундай кафолатни бера олмагани сабабли дастлабки келишув амалга ошмаган.
ФИФА қоидаларига кўра, битта халқаро танаффус доирасидаги ўртоқлик учрашувлари бир географик ҳудудда ўтказилиши ва жамоаларнинг учрашувлар оралиғидаги парвози икки соатдан ошмаслиги керак. Шу сабабли ўйинларни Осиё ва Жанубий Америкага бўлиб ўтказиш имконияти мавжуд эмас. Барча учрашувларни Аргентина ҳудудида ташкил этиш варианти ҳам кўриб чиқилган, бироқ АФА раҳбарияти юқори савиядаги рақиблар етишмаслиги сабабли бу таклифни рад этган.
Эдулнинг маълумотларига кўра, АФА Хитой вакиллари билан Хитой ва минтақадаги бошқа терма жамоаларга қарши бир нечта ўртоқлик учрашувларини ўтказиш бўйича музокараларни қайта бошлаган.
Мессининг ўйинларда қатнашишини кафолатлаш масаласи эса музокаралардаги асосий тўсиқ бўлиб қолмоқда. Бу талаб режалаштирилаётган турненинг молиявий шартларига ҳам бевосита таъсир кўрсатмоқда.
Аргентина 2026-йилги Жаҳон чемпионати финалида Испанияга мағлуб бўлганидан сўнг Месси мухлисларга самимий мурожаат йўллади, бироқ “Албиселесте” сафидаги келажаги ҳақида ҳозирча аниқ маълумот бермади.
Аргентина футбол ассоциацияси раҳбарияти ҳужумчини 2028-йилги Америка Кубогигача терма жамоада сақлаб қолишга умид қилмоқда. Бироқ Месси яна Аргентина терма жамоаси либосини киядими ёки йўқ — бу қарор ҳозирча фақат “Интер Маями” ҳужумчисининг ўзига маълум.
Аргентина Хитойда Ўзбекистонга қарши ўйнайдими?
Бўлажак халқаро танаффус учун рақибларни аниқлаш бутун дунёда жамоалар учун жиддий муаммога айланган. Европа терма жамоалари Миллатлар лигасидаги учрашувлар билан банд бўлгани сабабли, Аргентина учун потенциал рақиблар доираси сезиларли даражада торайган.
Шу сабабли Ўзбекистон терма жамоасига қарши эҳтимолий учрашув варианти пайдо бўлган. Бироқ ҳозирча унинг айрим тафсилотлари расман тасдиқланмаган.
Аввалроқ “оқ бўрилар” 30-сентябрь куни Хитойда Аргентина терма жамоасига қарши ўртоқлик учрашувида майдонга тушиши мумкинлиги ҳақида хабар берилган эди.
ЎФА ва АФА ҳозирча бу маълумотни расман тасдиқламаган. Шунга қарамай, учрашувнинг Хитойда ўтказилиши Аргентина терма жамоасининг Осиё турнеси бўйича режалари ва белгиланган географик талабларга мос келади.
Маълумот учун, Фабио Каннаваро бошқарувидаги миллий жамоа 24-сентябрь куни Фарғонада Эрон, 6-октябрь куни сафарда Корея Республикасига қарши баҳс олиб боради.
