«Манчестер Юнайтед» клубининг собиқ футболчиси ва «Интер Майами» ҳаммулки Дэвид Бекхэмнинг номи кутилмаганда Франциянинг «Нант» клубини сотиб олиш бўйича эҳтимолий битим иштирокчилари орасида пайдо бўлди. Бу ҳақда Ouest-France хабар берди.

Манба маълумотига кўра, яқинда Лига 2 дивизионига тушиб кетган «Нант» эгалари клубни сотиш имкониятини кўриб чиқмоқда. Айни пайтда клубни сотиб олишга учта эҳтимолий харидор даъво қилмоқда. Таклифлардан бири 100 миллион еврога баҳоланмоқда.

Шу билан бирга, нашрнинг таъкидлашича, Бекхэмнинг номи «яна муҳокамаларда пайдо бўлган». Унинг вакили аввалроқ маҳаллий потенциал инвесторлар ташаббус гуруҳи (Collectif nantais) вакиллари билан учрашган ҳамда «Нант» билан боғлиқ эҳтимолий лойиҳага қизиқиш билдирган.

Бекхэм футболга инвестиция киритиш борасида аллақачон муваффақиятли тажрибага эга. Унинг бойлиги 1,36 миллиард еврога баҳоланмоқда. «Интер Майами» эса унинг инвестициялари туфайли МЛСдаги энг кўзга кўринган лойиҳалардан бирига айланган.

Энди британиялик собиқ футболчи ўз футбол империясини Францияда ҳам кенгайтириш имкониятига эга бўлиши мумкин.