«Интер Майами» ҳужумчиси Лионель Месси МЛС тўпурарлари пойгасида пешқадамга айланди.

39 ёшли аргентиналик футболчи «Монреаль»га қарши 7:1 ҳисобида якунланган учрашувда хет-трик қайд этди. Месси 52, 83 ва 96-дақиқаларда рақиб дарвозасини ишғол қилди. Унинг 40-дақиқада киритган яна бир голи эса кейинчалик рақиб футболчисининг автоголи сифатида қайд этилди.

Шу тариқа, Мессининг МЛС-2026 мавсумидаги голлари сони 17 тага етди. У «Даллас» ҳужумчиси Петар Мусани ортда қолдириб, мунтазам чемпионатнинг энг яхши тўпурарига айланди. Хорватиялик футболчи ҳисобида 16 та гол бор.

Бундан ташқари, Месси жорий мавсумда 9 та голли узатмани ҳам амалга оширган. Бу кўрсаткич бўйича у лигада учинчи ўринни эгаллаб турибди.

6 сентябрь куни «Интер Майами» ўз майдонида «Атланта Юнайтед»га қарши баҳс олиб боради.