«Бавария»нинг собиқ футболчиси Рой Макай мюнхенликлар ҳужумчиси Харри Кейн жорий йилда «Олтин тўп»ни қўлга киритиши мумкинлиги ҳақида фикр билдирди.

«Агар Кейн «Олтин тўп»ни ютса, у бунга муносиб бўлади. Чунки у ўтказган мавсум шунчаки ажойиб эди. Аммо футболда ҳеч нарсани олдиндан аниқ билиб бўлмайди. «Олтин тўп»да шахсий дид ҳам маълум маънода роль ўйнайди.

Менимча, бу соврин учун курашаётган бир нечта футболчи бор, аммо Кейн асосий даъвогарлардан бири. Агар клубинг ва терма жамоанг учун шунча кўп гол урсанг, одамлар сени бош номзодлар қаторида тилга олиши табиий.

Мен Кейннинг «Олтин тўп»ни ютишини истардим, аммо бунинг учун октябргача кутишимизга тўғри келади», — деди Макай.

Ўтган мавсумда Харри Кейн «Бавария» сафида 51 та учрашувда майдонга тушиб, 61 та гол урди ва 7 та голли узатмани амалга оширди.