«Интер» ҳимоячиси Федерико Димарко Италия футболчилари ассоциацияси талқинига кўра ўтган мавсум А Сериянинг энг яхши футболчиси деб топилди.
Италия футбол федерацияси томонидан ташкил этилган Gran Galà del Calcio тақдирлаш маросими чоршанба куни Милан шаҳрида бўлиб ўтди. Турли номинациялар бўйича ғолиблар футболчиларнинг тўғридан-тўғри овоз бериши орқали аниқланди.
2025/26 мавсумида Димарко «Интер» билан Италия чемпиони бўлди. 28 ёшли ҳимоячи А Серияда 35 та учрашувда майдонга тушиб, 7 та гол урди ва 16 та голли узатмани амалга оширди.
Шу тариқа, Димарко чемпионатнинг энг яхши ассистенти ҳам бўлди.
