"Милан" ярим ҳимоячиси Лука Модрич "Реал Мадрид" билан хайрлашган пайтда қандай ҳиссиётларни бошдан кечиргани ҳақида гапирди.
— "Реал"дан кетганингизга бир йил бўлди. Хайрлашув кунини қандай эслайсиз?
— Мен у кунни катта фахр билан эслайман, гарчи жуда оғир кун бўлган бўлса ҳам. Буни ўйин олдидан олинган кадрларда, автобусда, қароримни эълон қилган кунларимда ва майдонда ҳам кўриш мумкин эди.
Майдонда ўзимни анча яхши ушлаб турдим, кейин нутқ сўзлаётганда ҳам. Аммо бу жуда ҳиссиётли ва ҳаяжонли давр эди, чунки футболчилик фаолиятимнинг энг гўзал босқичи якунига етаётганини тушуниб турардим.
Шунга қарамай, бу хотираларни катта фахр ва илиқ ҳислар билан эслайман. Орадан бир йилдан кўпроқ вақт ўтган бўлса ҳам, ҳали-ҳануз баъзан ўша кадрларни томоша қиламан. Трибуналарда йиғлаётган одамларни, барча хабарларни ва бошқа лаҳзаларни кўрганингда, дунёнинг энг буюк клубида муҳим иш қилганингни англаб, қалбинг фахр ва мамнуниятга тўлади.
— Кимга қийинроқ бўлди — сизгами ёки оилангизгами? Фарзандларингиз анча улғайган, Лука Модрич ким бўлгани ва ким эканини яхши тушунишарди.
— Менимча, ҳаммамизга қийин бўлди — менга ҳам, оиламга ҳам. Балки улар учун янада оғирроқ бўлгандир, чунки бутун умрларининг катта қисмини Мадридда ўтказишган. Айниқса, фарзандларим учун.
Ўғлим Англияда яшаётганимизда туғилган, Мадридга кўчиб келганимизда эса у икки ёшда эди. У бутун болалигини Мадридда ўтказди. Ҳозир у 16 ёшда.
Биз таътилда ёки бошқа жойда бўлганимизда, улар "Қачон уйга қайтамиз?" деб сўрашади. Улар уй деганда Мадридни назарда тутишади. Шунинг учун бу улар учун ҳам, мен учун ҳам жуда оғир бўлди.
Аммо бу ҳаётнинг бир қисми ва олдинга ҳаракат қилиш керак. Энди биз шу ердамиз. Бу осон эмас, лекин ўша хотиралар инсонга фахр, мамнуният ва бахт бағишлайди.
— Қайси бири қийинроқ бўлди — хайрлашишми ёки энди "Реал" футболчиси эмаслигингизга кўникишми?
— Шахсан мен учун хайрлашиш қийинроқ бўлди. Чунки эртами-кечми, бир кун келиб ҳаммаси тугашини қабул қилишга тўғри келади. Футбол ҳам, бошқа нарсалар ҳам...
Вақт ўтиши билан бутун борлиғинг билан яшаган айрим нарсаларингдан аста-секин узоқлаша бошлайсан. Менимча, мен учун хайрлашиш "Милан"га келиб, янги кун тартиби, янги ҳаёт ва янги клубга аста-секин мослашишдан кўра қийинроқ бўлди.
Хайрлашиш осон эмасди. Аммо айтганимдек, бу ҳаётнинг бир қисми. Клуб учун борингни берганингни билсанг, у ердан бошингни баланд кўтариб кетасан. Мен ҳам айнан шундай кетдим", — деди Модрич.
