Шимолий Ирландия терма жамоаси бош мураббийи Майкл О’Нилл «Ливерпуль»нинг ўнг қанот ҳимоячиси Конор Брэдли йил охиригача халқаро ўйинларга қайтмаслиги мумкинлигини тан олди.
«Конор ҳозир мен кутган босқичда. Бу жароҳат кўпчилик ўйлаганидан кўра узоқроқ вақт талаб қилишини билардим.
У яхши тикланяпти. Бундай жароҳатда жараённи жуда эҳтиёткорлик билан назорат қилиш керак. У яқинда ота ҳам бўлди, шунинг учун ҳозир бошқа ташвишлари ҳам бор. Уни табриклайман.
Конор тайёр ва соғлом бўлганида яна биз билан бўлади. Биз унинг қайтишидан жуда хурсанд бўламиз», — деди О’Нилл.
Брэдлининг фақат келаси йил майдонга қайтиши мумкинлиги ҳақидаги саволга мураббий шундай жавоб берди:
«Мен бу вариантни қабул қила оламан. Агар уни Рождествогача кўрсак, бу биз учун катта бонус бўлади. Агар бундай бўлмаса, март ойидаги халқаро ўйинларни кутамиз».
Брэдли январь ойи бошида «Арсенал»га қарши ўйинда тиззасидан жиддий жароҳат олган эди. У ҳозир «Ливерпуль»нинг машғулот базасида спорт залида тикланиш ишларини олиб бормоқда ва майдонга қайтишига ҳали анча вақт бор.
Шунга қарамай, ҳимоячи «Ливерпуль»нинг Чемпионлар лигаси умумий босқичи учун қайдномасига киритилган. Бу клуб уни келаси йил январь ойидаги ўйинларда иштирок этиши мумкин, деб ҳисоблаётганидан далолат беради.
