"Ювентус" ҳимоячиси Федерико Гатти Италия чемпионатининг 3-турида "Милан" билан 1:1 ҳисобида якунланган учрашув ҳақида фикр билдирди.

Гаттининг 90+2-дақиқада урган голи туринликларга ўз майдонида мағлубиятдан қутулиб қолиш имконини берди.

"Ҳайратда қолган бўлсангиз, узр, аммо мен аввал ҳам доим шундай қилганман. Бу менинг тарихим. Менда ички куч бор, ҳеч қачон таслим бўлмайман ва ҳаммага, ҳар қандай қийинчиликка қарши шу қатъият билан курашаман.

Ростини айтсам, бундай голлар очко ва қўшимча руҳий кўтаринкилик беради. Аммо агар шундай ўйинларда ғалаба қозонишни ва каттароқ мақсадларга интилишни истасак, анча кўпроқ иш қилишимиз керак", — дея 28 ёшли италиялик футболчининг сўзларини DAZN келтирди.

"Ювентус" 3 та ўйиндан сўнг 7 очко жамғариб, Италия чемпионати турнир жадвалида 4-ўринни эгаллаб турибди. 4-турда туринликлар 12 сентябрь куни сафарда "Сассуоло"га қарши майдонга тушади.