"Арсенал"нинг собиқ спорт директори Эду шартномаси бекор қилинганидан сўнг "Ноттингем Форест"ни тарк этди. Бу ҳақда Goal хабар берди.
48 ёшли бразилиялик мутахассис бир йилдан сал кўпроқ вақт олдин клубга футбол йўналиши бўйича глобал раҳбар сифатида қўшилган эди.
Сўнгги бир неча ой давомида Эду амалда иш жараёнида деярли иштирок этмаган. У февраль ойидан бери жамоа ўйинларига бормаган, март ойи бошидан эса стадион ва машғулот базасида ҳам кўринмаган.
Эду клубдаги трансфер сиёсати учун танқид қилинган. Катта маблағ сарфланганига қарамай, Омари Хатчинсон, Дуглас Луис ва Александр Зинченко каби футболчилар жамоа ўйинига кутилган даражада таъсир ўтказа олмаган.
"Ноттингем Форест" Эдунинг ўрнига алоҳида мутахассис тайинлашни режалаштирмаяпти. Унинг кетишидан сўнг футбол директори Жорж Сирианоснинг ваколатлари кенгайтирилган.
Эду "Ноттингем Форест"га ўтишидан олдин "Арсенал"да ишлаган ва 2022 йилдан клуб спорт директори лавозимини эгаллаган.
