Англия Премьер Лигасининг 2026/27 йилги мавсуми 4-туридан ўрин олган учрашувда “Челси” ўз майдонида “Халл Сити” билан дуранг қайд этди. “Стемфорд Бридж” стадионида бўлиб ўтган баҳс 2:2 ҳисобидаги дуранг билан якунланди.
Squawka портал хабарига кўра, “Челси” сўнгги 65 йил ичида илк бор АПЛ доирасидаги кетма-кет 20 та ўйинда ўз дарвозасидан гол ўтказиб юборди.
Учрашувда лондонликлар 7-дақиқада Морган Рожерснинг голи эвазига ҳисобни очди. 28-дақиқада Муҳаммад Беллуми мувозанатни тиклаган бўлса, 34-дақиқада дубль қайд этди. 66-дақиқада Жоау Педро гол уриб, “Челси”ни мағлубиятдан қутқариб қолди.
Морган Рожерс “Челси” тарихида Премьер Лига мавсумининг дастлабки тўртта учрашувининг ҳар бирида гол урган ёки голли узатма берган бешинчи футболчига айланди. Аввал бундай натижани Дидье Дрогба (2010/11), Сеск Фабрегас (2014/15), Диего Коста (2014/15 ва 2016/17) ҳамда Эден Азар (2018/19) қайд этган.
Шунингдек, август ойида Жоау Педро футбол тарихида жамоасининг АПЛ мавсумидаги дастлабки икки учрашувининг ҳар бирида гол уриб, ассист қайд этган учинчи футболчига айланганди. Бунгача бундай натижага фақат “Вест Ҳэм” футболчилари Саид Бенраҳма ва Майкл Антонио 2021/22 йилги мавсумда эришган. Педро “Халл Сити”га қарши баҳсда ҳам гол ва голли узатма қайд этди.
Ушбу дурангдан сўнг “Челси” 7 очко билан Англия чемпионати турнир жадвалида 4-ўринда бормоқда. 8 очко жамғарган “Халл Сити” эса 3-поғонани эгаллаб турибди.
Кейинги турда “Челси” 18 сентябрь куни сафарда “Брентфорд”га қарши майдонга тушади. “Халл Сити” эса 19 сентябрь куни меҳмонда “Ньюкасл Юнайтед” билан баҳс олиб боради.
