Ироқнинг «Ал-Қува ал-Жавия» клуби бош мураббийи Фетҳи Жебель Элит Осиё Чемпионлар лигаси босқичи 1-турида «Нефтчи»га қарши ўйиндан кейин ўз фикрларини билдириб ўтди.

Фарғонада ўтган баҳсда учрашув тақдирини 83-дақиқада сербиялик ҳужумчи Зоран Марушич ҳал қилди. У Куффининг ўнг қанотдан узатган тўпини боши билан дарвозага йўллаб, «Нефтчи»га мусобақани ғалаба билан бошлаш имконини берди.

«Эйр Форс» бош мураббийи Фетҳи Жебел жамоаси биринчи бўлимда жуда яхши ўйнаганини, бироқ иккинчи таймда сафар чарчоғи ва яқинда ўтказилган чемпионат учрашуви таъсирида ўйин суръати пасайганини таъкидлади.

«Биз биринчи бўлимда ажойиб ўйин намойиш этдик. Бироқ сафар чарчоғи ва яқинда чемпионатда ўйнаганимиз сабабли иккинчи бўлимдаги даражамиз пасайди.

Футболчиларимга яхши ўйин учун раҳмат айтаман. Кейинги учрашувларда ўзимизни тиклаб олишга умид қиламиз», — деди Жебель.

Мураббийнинг таъкидлашича, «Эйр Форс» мағлубиятга қарамай, кўпроқ нарсага лойиқ эди.

«Ўзбекистон жамоаси учрашув давомида биздан камроқ хато қилгани учун ғалаба қозонди.

Олдинда чемпионат ва Осиё Чемпионлар лигасида муҳим учрашувлар турибди. Биз йўл қўйган хатоларимизни тўғрилашга ҳаракат қиламиз», — деди у.

«Эйр Форс» ички чемпионатда ҳам мавсумни омадсиз бошлаган. Ироқ клуби Элит босқичининг кейинги турида 13 октябрь куни БААнинг «Ал Айн» жамоасига қарши майдонга тушади.

«Нефтчи» эса 12 октябрь куни Саудия Арабистонининг «Ан-Наср» клубини қабул қилади.