Ла Лига президенти Хавьер Тебас «Реал» клуб телевидениесининг фаолияти ҳақида фикр билдирди. Мазкур медиа вақти-вақти билан ҳакамликни кескин танқид қилиб келади.

«Ҳар доим бир хил ҳолат. Менимча, бу ўзини жабрланувчи қилиб кўрсатишнинг ўринсиз шакли. Энди улар фақат ўз муаммоларидан эмас, бошқаларнинг муаммоларидан ҳам шикоят қилмоқда. Хатолар бўлиб туради. «Реал» — катта клуб, аммо уларда доим бошқалар айбдор, ўзлари эмас», — дея Тебаснинг сўзларини Marca келтирди.

«Мухлис сифатида ҳозир «Реал»да нима учун очколар камроқ эканига доир кўплаб сабабларни айтишим мумкин эди, аммо бундай қилмайман. Ишончим комилки, «Реал» клуб телевидениеси шундай баёнотлар бермаса ҳам Ла Лигани юта олади», — деди у.

5 турдан кейин «Реал» 12 очко билан иккинчи ўринда бормоқда. «Барселона» эса 15 очко билан турнир жадвалида пешқадамлик қилмоқда.