«Бавария» спорт директори Кристоф Фройнд клуб билан шартномасини узайтирди. Бу ҳақда мюнхенликлар расмий сайти хабар берди.

Янги келишув 2029 йил 30 июнга қадар мўлжалланган. Шартноманинг молиявий тафсилотлари ошкор қилинмади.

«Бавария»нинг ривожига бундан кейин ҳам ўз ҳиссамни қўша олишимдан жуда хурсандман. «Бавария» — дунёнинг энг йирик клубларидан бири. Бу ерда иш бошлаганимдан буён ушбу лавозим мен учун қалб ишига айланди.

Биз биргаликда қизиқарли йўлни бошладик ва олдимизда ҳали эришишни истаган кўплаб мақсадлар бор. Бу ерда биргаликда ишлаш ниҳоятда руҳлантиради. «Бавария»ни мухлисларимиз ва барчамиз кўришни истайдиган жойда — энг юқори чўққида сақлаб қолиш учун янги ғоялар ва ташаббуслар билан ишлашда давом этамиз», — деди Фройнд.

49 ёшли австриялик мутахассис «Бавария»га 2023 йил ёзида келиб қўшилган. У бунга қадар «Зальцбург» клубида фаолият юритган.