Англия терма жамоаси ва «Кристал Пэлас» ярим ҳимоячиси Адам Уортон «Челси»нинг қишки трансфер ойнасидаги асосий мақсадларидан бири ҳисобланади.
Инсайдер Экрем Конурнинг ижтимоий тармоқлардаги маълумотига кўра, Лондон клуби 22 ёшли футболчи учун 80 миллион фунт, яъни тахминан 93 миллион евро тўлашга тайёр.
«Челси» Уортонни ўтган ёзда ҳам харид қилишга уринган, аммо ўшанда трансфер амалга ошмаган.
Адам Уортон 2024 йилдан бери «Кристал Пэлас» сафида тўп суриб келмоқда. Унинг бозор қиймати 70 миллион еврога баҳоланмоқда, клуб билан шартномаси эса 2029 йил июнь ойи охирига қадар амал қилади.
Ярим ҳимоячи жорий мавсум Англия Премьер-лигасида 4 та учрашувда майдонга тушди, аммо ҳозирча гол ёки голли узатма қайд этмади.
