«Барселона» вингери Ламин Ямал «Олтин тўп» учун овоз беришда қўлланилаётган айрим мезонларни адолатсиз деб ҳисоблашини айтди.

«Ҳозир бу совринга аввалгидан бироз бошқача қарашяпти. Месси ва Криштиану даврида ҳамма улар дунёнинг энг яхши икки футболчиси эканини биларди. Шунинг учун соврин асосан улар ўртасида ҳал бўларди.

Ҳозирги муаммо шундаки, одамлар «Олтин тўп»га алоқаси бўлмаслиги керак бўлган омилларни ҳам ҳисобга олишяпти.

Масалан, «ПСЖ» Чемпионлар лигасини ютгани учун соврин шу жамоа футболчисига берилиши керак, деган гаплар айтилади. Аммо Чемпионлар лигасини ютсанг, энг яхши жамоа сифатида совринни «ПСЖ» олади. Бу — жамоанинг мукофоти.

Бошқа масала — агар «ПСЖ» сафида дунёнинг энг яхши футболчиси ўйнаса. У ҳолда, менимча, «Олтин тўп» айнан дунёнинг энг яхши футболчисига берилиши керак. Шу билан масала тугайди.

80 та гол урган футболчига эмас. Чунки 80 та гол урсанг, мавсумнинг энг яхши тўпурари сифатида алоҳида соврин оласан. Бу бутунлай бошқа нарса, аммо одамлар буни тушунмайди.

Дунёнинг энг яхши футболчиси — ўйинини томоша қилганингда завқ оладиган, бошқалардан сезиларли даражада ажралиб турадиган футболчи.

«Олтин тўп» яна айнан шу тамойил асосида берила бошласа, яъни энг кўп гол урган ёки энг кўп соврин ютганга эмас, ҳақиқатан ҳам дунёнинг энг яхши футболчисига топширилса, у ўзининг ҳақиқий қадрини қайта тиклайди», — деди Ямал.