Испания миллий терма жамоаси бош мураббийи Луис де ла Фуэнте терма жамоадаги фаолияти давомида бошидан ўтказган энг оғир лаҳзани эслади.
Испаниялик мутахассиснинг таъкидлашича, Гавининг Вальядолидда олган оғир жароҳати бутун жамоа учун катта зарба бўлган.
"Бу барчамиз учун жуда оғир лаҳза эди. Ўзимизни худди бахтсиз ҳодиса сабаб яқин инсонни йўқотгандек ҳис қилгандик.
Танаффус пайтида кийиниш хонасидаги вазиятни кўрсангиз эди... Бу даҳшатли эди. Ҳамма ўша ерда эди, физиотерапевтлар Гавини қучоқлаб, унга тасалли беришарди. Жуда таъсирли манзара эди", деди де ла Фуэнте.
Мураббийнинг айтишича, ушбу оғир воқеа жамоа ичидаги муносабатларни янада мустаҳкамлаган.
"Албатта, бунинг салбий томони бор эди. Аммо биз ўша пайтда бу жамоа шунчаки футболчилар гуруҳи эмаслигини англадик. Кейинчалик Европа чемпионатида биз ҳақиқий "оила"га айландик", деди Испания термаси бош мураббийи.
