АҚШ терма жамоаси бош мураббийи Маурисио Почеттино Фоларин Балогун билан боғлиқ вазият жамоанинг 2026 йилги Жаҳон чемпионатидан чиқиб кетишига таъсир қилган бўлиши мумкинлигини айтди.
Балогун Босния ва Герцеговинага қарши учрашувда ҳимоячи Тарик Муҳаремович билан курашдан сўнг қизил карточка олган эди. Бу қоида бўйича бир ўйинлик дисквалификацияни англатарди.
Бироқ АҚШ футбол федерацияси ва мамлакат президенти Дональд Трамп ФИФАга мурожаат қилганидан сўнг Балогуннинг Бельгияга қарши кейинги учрашувдаги дисквалификацияси бекор қилинди. Кейинчалик Трамп ФИФА президенти Жанни Инфантино билан шахсан телефон орқали гаплашганини айтган.
«Балким, кейинчалик шунча салбий муносабатларга сабаб бўлган бу вазиятга кўпроқ аралашмаганимдан афсусланармандирман. Эҳтимол, қарор қабул қилиш жараёнида фаолроқ иштирок этишим керак эди.
Қизил карточка бўйича жазони бекор қилиш қарорига менинг алоқам бўлмаган. Футбол одами сифатида вазиятни тушунаман. Бу ерда майдондаги эпизодни тўғри ёки нотўғри баҳолаганимиз асосий масала эмас. Менимча, бу қарор қандай қабул қилинганини ҳеч ким тўлиқ тушунмади», — деди Почеттино.
Мутахассиснинг фикрича, бу воқеа Бельгияга қарши ўйинда жамоанинг руҳий ҳолатига ҳам таъсир қилган.
«Футболда ҳиссиёт ва вазият энергияси жуда катта аҳамиятга эга. Бир лаҳзанинг ўзи ҳаммасини ўзгартириб юбориши мумкин. Менимча, айнан ўша пайтда вазиятнинг энергияси ўзгарди.
Ўйин бутунлай бошқа йўналишга ўтиб кетди. Ўша баҳсда тактика, стратегия ёки футболчилар танлови воқеалар ривожини ўзгартира оларди, деб ўйламайман», — деди Почеттино.
АҚШ терма жамоаси ЖЧ-2026 1/8 финалида Бельгияга 1:4 ҳисобида мағлуб бўлиб, мусобақани тарк этган эди.
