«Бавария» келаси мавсум учун иккинчи дарвозабон позициясига Бундеслиганинг икки вакилини кўриб чиқмоқда. Бу ҳақда Bild хабар бермоқда.
Йонас Урбиг Мануэль Нойернинг издоши сифатида кўрилмоқда. Нойер ва Свен Ульрайхнинг шартномалари 2027 йилнинг ёзигача мўлжалланган бўлиб, клуб аллақачон янги иккинчи дарвозабон вариантларини ўрганмоқда.
28 ёшли Финн Дамен жуда жозибадор вариант сифатида баҳоланмоқда. Унинг ҳисобида Бундеслигада 101 та ўйин бор, «Аугсбург» билан амалдаги шартномаси эса 2027 йилгача мўлжалланган. 2025 йилнинг сентябридан бери у мунтазам равишда Германия терма жамоасига чақирилмоқда, аммо миллий жамоада ҳали дебют қилгани йўқ.
Шу билан бирга, «Бавария» ва Дамен ўртасида музокаралар ҳали бўлиб ўтмаган — клуб шунчаки дарвозабон номзодини муҳокама қилган, холос.
Мюнхенликлар учун яна бир вариант сифатида «Кёльн»нинг 31 ёшли дарвозабони Марвин Швебе кўрсатилмоқда. Унинг шартномаси ҳам 2027 йилнинг ёзида ниҳоясига этади.
