Гана футбол ассоциацияси ва миллий терма жамоа бош мураббийи Карлуш Кейруш ўзаро келишув асосида шартномани бекор қилди. Бу ҳақда ташкилот расмий сайти хабар берди.
Томонлар ўзаро муҳокамалардан сўнг шундай қарорга келган. Таъкидланишича, бу қарор Гана, миллий терма жамоа ва мамлакат футболи манфаатларига мос келади.
Гана футбол ассоциацияси Кейрушга бажарган ишлари, профессионаллиги ҳамда жамоа ва ёш футболчилар ривожига қўшган ҳиссаси учун миннатдорлик билдирди.
Португалиялик мутахассис Гана терма жамоасини 2026 йилги жаҳон чемпионатида бошқарди, шунингдек, жамоа билан Африка миллатлар кубоги саралаш босқичини бошлади.
Бироқ Гана Кот-д’Ивуарга 0:2 ва Гамбияга 2:4 ҳисобида мағлуб бўлди. Натижада жамоа ўз гуруҳида сўнгги ўринга тушиб қолди.
