"Милан" ярим ҳимоячиси Кристиан Пулишич Италия клубида қолишни хоҳлаётганини маълум қилди. Америкалик футболчининг амалдаги шартномаси мавсум якунида тугайди, бироқ "Милан"да келишувни яна бир йилга узайтириш имконияти бор.
"Ҳозир "Милан"да жуда бахтлиман ва шу ерда қолишни хоҳлайман. Айни пайтда шартномани узайтириш ҳақида ўйламаяпман, аммо бу ерда ўзимни жуда яхши ҳис қиляпман", — дея Пулишичнинг сўзларини Daily Mail келтирди.
28 ёшли футболчи, шунингдек, голсиз сериясини тўхтатгани ҳақида ҳам гапирди. У 20 сентябрь куни "Лечче"га қарши 3:0 ҳисобида якунланган ўйинда гол урган эди.
"Бу мен учун катта енгиллик бўлди. "Милан" сафида анча вақтдан бери гол урмаган эдим, шунинг учун бу менга жуда ёқимли бўлди", — деди у.
Мавсум бошида жароҳатдан тикланган америкалик футболчи А Сериядаги дастлабки учта ўйинни захирада бошлади. Кейин у "Лацио"га қарши 2:2 ҳисобида якунланган баҳсда захирадан майдонга тушиб, голли узатмани амалга оширди, навбатдаги учрашувда эса гол урди.
